يوم بعد يوم عم نغرق ويتراجع وضعنا من السيئ للأسوأ، إن كان ع مستوى المعيشة، ولا ع مستوى الخدمات، ولا ع مستوى الممارسات الشاذة بواقعنا، وما حدا داير علينا من المسؤولين اللي مو شاطرين إلا بالحكي..
يعني المسؤولين بيعرفوا كل المشاكل تماماً وبيحكوا فيها كتير كتير بس النتيجة هيه هيه.. اللي معو عايش ومترفه ومدعوم ولا ع قلبو هم، وعم ينتف فينا ليل نهار وعلى عينك ياتاجر.. واللي ما معو راحت عليه وع ولادو.. وبعد كل هاد ما في مانع يكون الحق علينا فوق كل السم والدم اللي معيشينا فيه كمان..
المشكلة ما وقفت عند هون وبس.. لك صار في مشكلة أكبر من هيك أنو في كتير ممارسات ومشاهدات يومية شاذة صارت وكأنها أكتر من عادية.. يعني تعودنا نشوف الأطفال عم تشحد بالشوارع بدل ما يكونوا بالمدارس.. وتعودنا نشوف ولاد هربانين من المدارس وعم يصيعوا بالحدائق أو بالكافيهات.. وتعودنا ع أنو تلميذ الابتدائي بدو دروس خصوصي.. وطالب الجامعة بدو يدح ويشتغل ويدرس ويتأقلم مع نسب النجاح المنخفضة والتطفيش.. وتعودنا ع زحمة المواصلات والتدفيش.. وتعودنا نشوف جرار الغاز عم تدحرج بالشوارع وعم يعتلوها الختايرية والنسوان ويرجعوا فيها فاضية.. وتعودنا ع أنو يكون في تقنين وأعطال كهربا.. وتعودنا ع أنو أزمة المازوت بتنحل بالسوق السودا.. وتعودنا أنو أي معاملة معصلجة بتمشي بشوية رشرشة ولو كانت من فوق الأساطيح.. وتعودنا ع ارتفاعات الأسعار وأسبابها اللي ألها أول وما لها آخر.. وتعودنا ع أنو كل 6 شهور نبدل بيت الأجار أو نزيد الأجرة.. وتعودنا ع الواسطة والمحسوبية والبلطجة.. وتعودنا نسمع عن حوادث التهريب والتحشيش والدعارة والسرقة والتعفيش والنهب والسمسرة والفساد.. متل ما تعودنا ع رواتبنا الهزيلة اللي ما بتكفي أسبوع والحكومة عم تضحك علينا فيها وكأنها مفضلة ع نافوخنا كمان.. ومتل ما تعودنا نسمع عن الدعم الملياري اليومي والوعود الحكومية الطنانة ونطنشها.. وح نتعود نسمع عن مين تارك مولود حديث ع بواب الجوامع أو بحاويات الزبالة.. أو ح نتعود ع سماع قصص الانتحار من الفقر والتعتير.. لك في لسا مصايب وشذوذ أكتر من هيك..
لك كل هاد مو شذوذ بحياتنا وصار واقع مفروض علينا لنتعايش معو غصب عنا.. لدرجة أنو كل هالشذوذ اليومي وكأنو أقل من عادي وقدر مكتوب علينا كمان.. ومصيبة المصايب أنو في مين بدو يانا نتعود أنو نشوف كل هاد وما نحكي.. العمى ولوووووو..
طيب ليش هيك.. ومين المسؤول عن كل هالتردي والتراجع والشذوذ اللي صار حالة كتير عادية بحياتنا ويومياتنا؟.
هلأ إذا منقول أنو الحق ع الحكومات وسياساتها وطناشها ع مسؤولياتها وواجباتها المتراكمة من زمن وزمنة، بيطلع شي فصيح ومزاود ليحط الحق علينا وع الأخلاق والمجتمع، المهم يبعد التهمة عن المسؤولين الحقيقيين عن كل اللي صار وعم يصير فينا.. يعني متل ما قلنا بالبداية أنو وبعد كل هاد ما في مانع يكون الحق علينا فوق كل السم والدم اللي معيشينا فيه!.
بكل الأحوال القصة كبيرة كتير.. والشاذ شاذ مو ممكن ينبلع ولو في مين عم يحاول يفرضو فرض حتى يصير وكأنو قدر علينا.. لك المسؤولين نفسهم قالوا أنو في أزمات مفتعلة.. يعني في مين وراها وما بدو يحلها.. متل كل الظواهر والمظاهر الشاذة اللي في مين وراها كمان مشان يزيد علينا المآسي والمصايب.. طيب وبعدين..!
لك العالم كلها صارت بتعرف أنو كل شي صار بدو تغيير من شروشو، مشان ترجع حياتنا إلنا، ومشان نرجع نعيش بكرامة.. وإذا ما صار التغيير بهاد الشكل ما ح نخلص لا من مشاكلنا ولا من أزماتنا ولا من اللي وراها وعم يستفيد منها ع حسابنا وع حساب ولادنا والبلد..
وبالمختصر المفيد بدنا التغيير مشان نعيش.. لأنو هي مو عيشة!.
جريدة قاسيون
The post بدنا التغيير مشان نعيش appeared first on يوميات في دمشق.
from يوميات في دمشق https://ift.tt/2FlhTVX